ŞD, 1862-7-1
Bâb-ı Âlî
Daire-i Umûr-ı Dahiliye
Mektûbî Kalemi
Aded: 995

Huzur-ı âlî-i hazret-i Sadâret-penâhî'ye

Ma‘rûz-ı çâker-i kemîneleridir ki
Habsamana Nâhiyesi'nin merkezî yol uğrağı olmak ve kasaba hâlinde bulunmak hasebiyle evzân ve ekyâlin ve tabh olunan nân-ı azizin daima teftiş ve muayenesi lâzımeden ise de merkez-i nâhiyede belediye olmamasına ve buna mahsûs çavuş bulunmamasına mebnî bu vazife ile mükellef olmak üzere bir beledî çavuşunun tayini mezkûr nâhiye müdürlüğünden iş‘âr olunmuş ve nâhiyelerde beledî olmadığı cihetle çavuş tayini kabil değil ise de evzân ve ekyâlin ve nân-ı aziz ile sâirenin muayenesizkalması da gayr-ı caiz bulunmuş olmasıyla bu vazifenin nâhiye müdür veya zâbıta me’mûrundan hangisine tevdî‘i lâzım geleceği ve nâhiyelerdeki mal sandıkları ilgâ edilip merkez-i kazâya nakl edilmiş olmasına mebnî Beledî Kânûnu mûcebince ahzı îcâb eden cezâ-yı nakdîlerin dahi nereye teslîm edileceği ve cezâ-yı nakdînin mikdarı meclis-i nâhiye tarafından takdîr edilmek mi iktizâ edeceği kesdirilemediğinden bahis ile istifsâr-ı mu‘âmeleye dâir Trabzon Vilâyet-i Aliyyesi'nden vârid olan 18 Nisan sene [1]323 târihli ve yetmiş dokuz numaralı tahrîrât leffen takdîm kılındı. sûret-i istifsara nazaran iktizâsının Şûrâ-yı Devletçe te’emmülü menût-ı re’y-i sâmî-i Sadâret-penâhîleridir. Ol bâbda emr u fermân hazret-i veliyyü'l-emrindir.
Fî 9 Rebî‘ulâhir sene [1]325 ve fî 9 Mayıs sene [1]323
Nazır-ı Umûr-ı Dahiliye
[imza]